Интензивно продолжува инфо кампањата по повод објавениот јавен повик 01/2025 за мерка 1 – Инвестиции во основни средства на земјоделски стопанства од ИПАРД Програмата 2021-2027 (ИПАРД 3). Кампањата започна на 20.02.2025 година со посета на повеќе места низ Македонија, а денеска 04. март (вторник) продолжи во Босилево и Василево.
Претставниците на Телото за управување со ИПАРД (Министерство за земјоделство, шумарство и водостопанство), Агенцијата за финансиска поддршка во земјоделството и руралниот развој и Агенцијата за поттикнување на развојот на земјоделството остварија среби со заинтересираните корисници (физички, правни лица, задруги итн.) кои сакаа да се информираат за можностите, условите и постапките за аплицирање на тековниот јавен повик со цел користење на средства од оваа програма.
Пред присутните заинтересирани корисници, детално беше образложена мерка 1 од ИПАРД 3 Програма 2021-2027, наменета за примарно земјоделско производство. Претстваниците на Телото за управување со ИПАРД при МЗШВ, ја презентираа мерката согласно објавениот јавен повик, додека претставниците од Агенцијата за финансиска поддршка на земјоделството и руралниот развој ја презентираа деталната постапка пред АФПЗРР за користење на средства од ИПАРД Програмата 2021-2027. На средбата, беа одговорени сите прашања, нејаснотии и детали околу правилна подготовка на докуметацијата и текот на постапката за аплицирање, со цел да им се помогне на сите кои ќе аплицираат да имаат добро подготвена документација и навремено да аплицираат.
Караванот продолжува и утре 5. март (среда), со информативни средби во Конче со почеток од 11:00 часот во општинската сала и во Радовиш со почеток од 14:00 часот во општинската сала. Во четврток ќе се одржат средби во Берово и Виница, а во петок инфокараванот продолжува во Неготино и Гостивар.
Дополнителни информации околу деталите, потребните документи и јавните повици, сите заинтересирани може да ги добијат на следниве веб страници и телефонски броеви:
- Тело за управување со ИПАРД фондовите при Министерство за земјоделство, шумарство и водостопанство – https://ipard.gov.mk или 02/3134-477 локал 113, 114 и 115;
- Агенција за финансиска поддршка во земјоделството и руралниот развој – http://www.ipardpa.gov.mk или на 02/3097-460 и 070/229-434 (сектор за одобрување на проекти), 070/229-328 (сектор за одобрување на исплати)
- Агенција за поттикнување на развојот на земјоделството – http://agencija.gov.mk/ или на 047/228-330 и 047/228-370.
Се повикуваат сите заинтересирани корисници да присуствуваат на инфо средбите со цел полесно информирање и искористување на мерка 1, имајќи предвид дека крајниот рок за поднесување на барањата од овој јавен повик е 29 март 2025 година.
